naa paata kavitvam - 20

January 93

కోరిక 

ఆలోచనలు రేపే అసంతృప్తి

నా గుండె మీద నా కత్తితో 

నేను చేసుకున్న గాయపు నెత్తుటి చార 

వేళ్ళ సందుల్లోంచి జారిపోయే

ఇసుక రేణువుల కాలం

అలుపు లేకుండా ఎంత పరిగెత్తినా

ఎడ తెగని పందెం లాంటి జీవితం

క్షణం లో అటు వైపు

దాటితే మరో మలుపు

శిధిలమైన మెదడు స్రవించే 

వెచ్చటి ఎర్రటి కన్నీటి చుక్కలు

బ్రతుకు ఒక మొసాయిక్ 

కేటాబాలిజం ఆవరించేవరకు 

కాలుష్యం పీలుస్తూ ఇలాగే 

ఇది నిరాశ కాదు, నిస్పృహ లేదు 

ఇది నిజం అంతే

ఒక చూపు, ఒక నవ్వు

కన్నీట ఒదిగిన ఓదార్పు

కావాలనే ఒంటరితనం కాదు 

ప్రతి క్షణం చైతన్యం తో 

వెల్లివిరిసి, ప్రతి క్షణం 

అందమైన అనుభూతులు

మిగిల్చి, ఆలోచనలు రగిల్చే

ఆవేశం కావాలి

కట్టేసిన ఈ చేతులకు

విముక్తి కావాలి

నాలోని ప్రతి అణువుని

నా జిజ్ఞ్యాసని 

నాలోని విజ్ఞ్యాన జిఘ్రుక్షని 

నా ప్రతి కదలికని 

శాసిస్తున్న సంఘ కాళి

నా ఎముకల మాల 

తన మెడను అలంకరించుకోక  ముందే 

" నాకు స్వేచ్చ కావాలి"