ఈ రోజు రాత్రి నాకు
" నేనెంత సామాన్యుణ్ణి"
అని అనుకోవడం ఎంతో తృప్తినిచ్చింది
నిజం తెలిసిన తరువాత
విరిసే శాంతిలా
స్తబ్ధమైన వెన్నెల
ఆలోచనలు కాలి
అంతమయ్యే క్షణంలో
నిట్టూర్పుతో కలిసిన నవ్వు
అందమైన కలలు
కనే ఈ మనసున్నందుకు
నా అహం చూపే గర్వం
చేయ్యగలిగీ చెయ్యలేని
నా అసమర్ధత
చేసినా చిన్నదానిలో కూడా
నా గొప్పతనం
చూసుకోగల లౌక్యం
ఎండమావుల వెంటపడి
దొరకలేదనే అసంతృప్తి
నా బ్రతుకులో లేని
రసం లేదు - భావం లేదు
జన జీవన స్రవంతిలో
కలిసిపోతూ వేరుగా
నేనున్నాననే భ్రమలో
నా అస్తిత్వం నిలబెట్టుకోవాలనే
నా తాపత్రయం నాకు
ఈ రాత్రి నవ్వు తెప్పించింది
నేను లేకపోతె
ఈ ప్రపంచమేది
భ్రమౌనో కాదో తెలీదు
ఏది నేను మిధ్యనుకోలేదు
నేనున్నంతవరకు
ప్రతీది నిజమే
ప్రతి క్షణం నాకున్న
అంతర్ బహిరింద్రియాల
సహకారంతో నేను నా గురించి
ఈ అర్ధరాత్రి కనుక్కున్న
గొప్ప సత్యం ఇదే
" నేనెంత సామాన్యుణ్ణి"
అని అనుకోవడం
నాకు నిజంగా సంతృప్తి ఇచ్చింది
No comments:
Post a Comment